1
Dar Oma
whit garred thaim claa awa?
whit lenths did they traivel?
the lift wis fou o faw'n sterns...
licht's fair taen up wi Ye
suin the heivens'll be scabbit
2
Dar Oma
yestreen
a gaed reengin
fir Ye
an fund Ye
a'whaur
parteeclar
i the flicht o swallaes
coontless
i the derk err
as though they ettled
tae waff the deein sin
tae lowe
3
Dar Oma
leuk at this fou fruit
faw'n fir Ye ilka time
unawaurs
this tree
its brainches Yer ain
seepin sap
its ruits
its fume Yours
crottle claps tae bark
haud me
deep deep doun Ye're aye thair
bidein ma flourishin in Ye
Kirtana o croonin leaves
4
Dar Oma
hauden yer eemage afore me
on a screen
eikin percentages
gin Ye murl
lik sum foryatten galaxy
cryin ye tae retour
a wunnin back
a lissance frae menseless naethinness
a ken sterns'r born
anely tae dee
we glisk the licht
o the heivenly boadies
langsyne gane
this a ken:
Yer licht sheens in me
the Universe hauds nae grue