Grá agus Suan

 

Oilithreach mílítheach meanmnach mé a múnlaíodh

as dusta is dorchadas.

Eabhar leáite an mhaidneachain i m’inchinn,

dúil bhuartha ionatsa im’ chroíse.

Cogar i dtaobh na n-uaireanta corcra a thiocfaidh,

       cogar faoin ngealshíoraíocht a d’imigh

Do mo mhealladhsa soir is siar is asam féinig.

Mo chreach! An ligfead mo scíth tamall

ar an talamh méith, nó taisteal siar

Chun na heabhar-shíoraíochta? Seasaim, moillím,

I m’oilithreach mílítheach meanmnach

       a múnlaíodh as dusta is dorchadas.

        

Benjamin De Casseres (1873 -1945)

Dead Flag Blues

tá an carr trí thine is níl tiománaí ar bith ag an roth

agus tá na séaraigh modartha ag neacha féinmharaithe

agus séideann gaoth dhorcha

tá an rialtas lofa

agus táimid pulctha le drugaí

an raidió ar siúl is na cuirtíní tarraingthe

gafa i mbolg an mheaisín uafásaigh seo

agus tá an meaisín ag éag is ag cur fola go tréan

thit an ghrian ina pleist

agus tá na cláir fógraí ag amharc orainn go mioscaiseach

agus na bratacha go léir marbh ar bharr na gcuaillí

is mar seo a tharla sé:

sceith na foirgnimh

bhí máithreacha is greim acu ar a gcuid naíonán sa smionagar

ag tarraingt ar a gcuid gruaige

bhí an spéirlíne go haoibhinn, trí thine,

miotal lúbtha ag síneadh in airde

ceo tanaí oráiste os cionn an uile ní

arsa mise, ‘póg mé, tá tú go hálainn –‘

is é deireadh an domhain é gan aon agó.’

rug tú greim láimhe om agus thiteamar síos

mar a bheadh brionglóid lae nó fiabhras ann

dhúisíomar maidin amháin is chuamar síos níos faide –

mar is é gleann an bháis é cinnte dearfa

osclaím mo vallait

agus is ag púscadh fola atá sí

Efrim Menuck 

Caoineadh

A ghaoth gharbh a chaoineann go géar

Dobrón róthrom dom’ laoithe

A ghaoth fhiáin, tá do dhú-néal

Le clos ar feadh na hoíche.

Stoirm dhuairc, cad is fiú do dheora

Coillte loma na ngéag briste

Pluaiseanna dorcha, liathuiscí

Caoinigí an éagóir choíche!

Percy Bysshe Shelley