2014-10-06

Ní léirmheas ar léirmheas é seo!

Léirmheas leis an Dr Ailbhe Ní Ghearbhuigh ar an gcnuasach Cuach Ó Aois Eile ag Glaoch (Coiscéim), léirmheas a bhuaigh duais Oireachtais i mbliana. Foilsíodh leagan de i gComhar. Tréaslaím léi é.


Nílimse chun léirmheas a scríobh ar an léirmheas ach cé a dúirt le hAilbhe gur Búdaí mé? Chonaic mé an ráfla sin ar an iris COMHAR ceart go leor, iris a thug bata is bóthar dom mar cholúnaí. (Dá mba Bhúdaí a bhí ionam ní luafainn é sin!) Dála an scéil, deir lucht sanasaíochta linn go bhfuil an focal Páilise 'buddha' gaolta le 'bod' na Gaeilge. Anois duit! Foghlaimímid rud éigin nua gach maidin, sinne a bhíonn inár mbúdaithe (inár ndúiseacht) go moch ar maidin!
Ní Búdaí mé cé go bhfuil scoileanna éagsúla den Bhúdachas tar éis dul i bhfeidhm orm, an Zen-Bhúdachas, mar shampla, chomh maith le 'Pure Land Buddhism' mar a thugtar ar an mBúdachas a shamhlaítear leis an máistir haiku Issa, gan trácht ar an nGaois Bhuile (nó 'Crazy Wisdom') go háirithe mar a d'fhoghlaimíos é trí theagasc Chogyam Trungpa -  agus a thuilleadh scoileanna Búdachais nach iad. An saothar is déanaí uaim ná 100 haiku, i nGaeilge agus i mBéarla, a scríobhas tar éis dom machnamh a dhéanamh ar ghrianghraf a glacadh de Trungpa agus gunnán dírithe ar a chloigeann aige. (Níor foilsíodh an saothar seo fós). Tá go maith, ach níor fhógraíos riamh gur Búdaí a bhí ionam. Ní fhéadfainn é sin a dhéanamh nuair atá an oiread eile sin tar éis dul i bhfeidhm orm (go smior): Bhakti, cuir i gcás, Súifeachas, Seamanachas, Daochas agus Advaita. Is i mo Chaitliceach Rómhánach a tógadh mé. Ní Rómhánach a bhí riamh ionam, ar  ndóigh.
Tá leabhar haiku eile agam, i nGaeilge agus i mBéarla, (nár foilsíodh fós) leabhar atá bunaithe ar an nGael-Airgintíneach Ché Guevara ach ní hionann san is a rá gur Guevarach mé.

Anois, tá an méid sin tugtha chun soiléire agam, tá súil agam!

Ar an lá seo 6 Deireadh Fómhair

Ar an lá seo 6 Deireadh Fómhair, 1591, rugadh Settimia Caccini

AMHRÁIN NA SAOIRSE: TIONSCADAL BOB MARLEY


Mair ní ar do shon féin ach ar son daoine eile an soiscéal a bhí ag an bhfáidh reggae Bob Marley, duine de mhóroirfidigh an 20ú haois. Athruithe sóisialta agus réabhlóid spioradálta a d'éiligh sé ina chuid amhrán agus san am  céanna lig sé dá chuid éisteoirí a mbuairt a dhearmad agus damhsa leis an gceol.

Cuirfidh Amhráin na Saoirse: Tionscadal Bob Marley an chuid is fearr dá shaothar i láthair. Gaeilge ghleoite curtha ag Gabriel Rosenstock ar na liricí, Liam Ó Maonlaí agus an banna reggae Béal Feirsteach Bréag, Steve Cooney, Natty Wailer,  Justine Nantale, Esosa Ighodaro agus Zeenat Sarumi a chanfaidh. Íomhánna breátha ar scáileán le Margaret Lonergan.


Dé hAoine 10 Deireadh Fómhair
Pavilion Theatre, Dún Laoghaire
Cead isteach/admission €20/18
Booking (01) 231 2929 or online at www.paviliontheatre.ie
or www.entertainment.ie/imram

2014-10-05

Seoid

an áit a dtéann an ghrian
nuair a bhíonn na gormacha
uirthi

John Scarlett

Ar an lá seo 5 Deireadh Fómhair

Ar an lá seo 5 Deireadh Fómhair, 1923, rugadh an tAthair Philip Berrigan.
"Mór-mhaorlathas í an eaglais agus bíonn mór-mhaorlathais easumhal don soiscéal."

2014-10-04

Anocht an oíche/ Tonight's the night

Anocht an Oíche

Deir an fógra
Fan Amach!
Zutritt Verboten!

Cén fáth?
Cad tá ar bun istigh ann?
Chuala go raibh rud éigin ar siúl
le coiníní ann
céasadh de shaghas éigin
iad á bpulcadh le sceallóga
und borgairí McDonalds.

Ní fheadfadh sé bheith fíor
an bhféadfadh?

Gearrfaidh mé tríd an tsreang anocht.
Feicfimid ambaist.

Tonight’s The Night

The sign says
Stay Out!
Zutritt Verboten!

Why is this?
What’s going on?
I hear they’re experimenting with rabbits
some kind of torture
stuffing them with fries
und McDonalds burgers.


Couldn’t be true
could it?

I’ll cut through the wire tonight.
We’ll bloody well see.

Cillíní